Dharma Wacana "rahina saraswati"

NASKAH DHARMA WACANA

(           RAHINA SARASWATI      )

Suksma aturang titiang antuk galah sane kapica ring sikian titiang pacang ngwentenang atur samatra ring  galahe sane becik kadi mangkin.

·         Kaping singgih Bapak Manggalaning  Dinas Pendidikan Pemuda lan  Olahraga Kab. Badung

·         Bapak Kepala Bidang Dikluspora sane singgihang titiang

·         Bapak Kepala Seksi sane kusumayang titiang

·         Para narawakya sane wangiang titiang

·         Para angga panuntun sane taler wangiang titiang

·         Asapunika taler para yowana pamilet pasraman Dharma Duta Yowana Kab. Badung warsa 2015 sane tresnasihin titiang.

Sadereng titiang ngwentenang atur samatra pinih riin ledangan titiang ngaturang puja pangastuti pangayubagia majeng ring Ida Sang  Hyang Widhi Wasa, duaning wantah sangkaning asung kerta wara lugrahan ida, titiang aspunika taler ida dane sareng sami prasida rahajeng mapupul iriki kadi mangkin. Duaning asapunika ngiring ngaturang puja pangastuti malarapan antuk ngaturang pangastungkara panganjali “ Om Swastyastu”.

Ida dane sareng sami sane singgihang titiang, mungguing atur titiang ring galahe sane becik puniki memurdha “Rahina Saraswati ”

Napi mawinan titiang  ngambil murdha punika, boya ja tios santukan mangda ida dane sareng sami uning tetuek rahina Saraswati.

Inggih ida dane sareng sami  sane banget baktinin titiang, manawi ida dane sampun uning napi mawinan i rage sareng sami nyakupang tangan ring rahina sane mangkin. I raga dados umat magama Hindu patut mangabakti ring Ida Sang Hyang Widhi Wasa masrana antuk aturan saha nyakupang tangan kadasarin antuk manah suci nirmala ri kala nyanggra piodalan Ida, minakadi piodalan Sang Hyang Saraswati, sane nyihnayang tedunne  Sang Hyang Aji, lambang kaweruhan.

Yening inargamayang titiang Sang Hyang Widhi pateh ring Bhatara Surya sane madue sinar, sinar punika sane marupa lambang Sang Hyang Saraswati nyinarin jagate makasami, mangdenne prasida ngamolihang kalanduhan miwah karahayoan. Sapunika taler kaweruhane punika marupa sinar ring i manusa mangdene uning ngunadikayang sane patut kalawan tan patut. I raga patut sareng sami mangayu bagia majeng ring Ida Sang Hyang Saraswati, saantukan Ida sane ngicenin karahayuan, kawicaksanaan, kawibawaan miwah sakancan kaweruhane sane katiba ring i manusa malantaran antuk sastra.

Ida dane sareng sami sane wangiang titiang,  rahinan Saraswati punika rauhne nenem sasih, ingggih punika ri kala Saniscara Umanis Wuku Watugunung.

Indik sapulah palih parindikan rahina Saraswati punika kapalihang dados tigang rentetan sakadi puniki:

1.      Ring rahina Saraswati punika saking semeng jantos pajeg surya i raga sareng sami maturan ka sanggah utawi ka mrajan soang-soang miwah mantenin buku utawi lontar druene. Sakewanten sadurung maturan, nunas tirta dumun ring Ida Pranda utawi ring sesuunan ragane soang-soang. Sasampun banten punika kantebang raris kasiratin tirta Saraswati ping lima. Wusan punika wau ragane siratin tirta ping tiga, kaajeng ping tiga, maraup taler ping tiga. Tetujon i ragene nunas tirta Saraswati punika tan lian wantah mangda Ida ngicenin karahajengan miwah kaweruhan sane mautama. Tirta punika taler dados anggen nyuciang raga, ngicalang sakancan kaletehane sane wenten ring ragane, pradene mrasidayang galang apadang ening tan pasing sing.

2.      Rentetan sane kaping kalih wantah masambang semadi. Ri kala masambang semadi patut majagra sinambi ngwacen lontar-lontar suci kaagamaan, minakadi: Bgawadgita, Sarasamuscaya, Ramayana, Bratayudha miwah sane lian-lianan. Ring sajeroning sambang semadi punika i raga patut mabrata tan dados mapunyah-punyahan. Brata puniki madue tetujon mangda nenten ngulurin indria ritatkala ngamargiang samadhi, ngwacen lontar- lontar suci punika pinaka tangkis majagra, sinambi nunas pangweruhan majeng ring Sang Hyang Aji Saraswati..

3.      Rentetan sane kaping tiga, inggih punika mabanyu pinaruh risampun awengi majagra, mabrata nglaksanayang sambang semadi. Benjangne pasemengan raris mabanyu pinaruh ka beji utawi ka segara masiram tur matirta. Tetujon i raga mabanyu pinaruh wantah nyuciang raga, mangda kaletehane sane wenten ring ragane prasida ical. Rikala mabanyu pinaruh punika i raga masiram antuk toya kumkuman, inggih punika toya sane madaging sekar sarwa arum. Usan punika dados sampun mantuk. Sarauhe ring jero dados sampun antebang bantene, sakewanten siratin dumun antuk tirta Saraswati. Luu banten punika iket antuk tali raris genahang ring luhur korine utawi lawangane. Tetujonnya wantah nyihnayang i raga subakti saha sampun ngamolihang kaweruhan.

Inggih ida dane sareng sami sane baktinin titiang, manawi ida dane sareng sami sampun naenin nyingak lambang Saraswati. Ring simbul punika kasinahang, Ida maduwe tangan kalih pasang soang-soang ngagem ganitri, lontar miwah rebab. Ida ngalinggihin angsa. Irika taler wenten tunjung sane kasanding antuk paksi merak sane dahating asri pakantenan ipun. Samian punika marupa simbul sane maduwe arti sakadi puniki.